القائمة الرئيسية

الصفحات

مراجعة Realme 8 Pro




 موبايل Realme 8 Pro هو أقوى موبايل حاليًا في سلسلة ريلمي 8 .. الموبايل بشكل عام بيهتم أكتر بإنه يقدملك أقوى كاميرات في الفئة المتوسطة بكاميرا خلفية 108 ميجا بيكسل .. في مراجعة Realme 8 Pro النهارده هنعرف هل فعلًا الموبايل ده بيقدم أقوى كاميرات في الفئة المتوسطة ولا لأ ؟ وهل تطوير الكاميرات خلانا نشوف تنازُلات عن Realme 7 Pro ولا لا !

التصميم :-

تصميمه بلاستيك بالكامل .. بس الظهر مطفي ومصنفر زي موبايلات اوبو كده .. فا أحسن بكتير طبعًا في البصمات والخدوش من ريلمي 8 العادي ( الي بيلم بصمات ) ..  كلمة Dare To Leap الي معناها “يجروء على القفز” مكتوبة كبيرة أوي في ظهر الموبايل وشكلها مش لطيف.

الكاميرا الخلفية بارزه شوية عن الظهر .. بس برده في المعقول والجراب بيتعامل ويغطي البروز .. والموبايل بوزن 176 جرام وتخانه 8.1 ملم فهو ممتاز في الاستخدام بايد واحدة.



الشاشة :-

الشاشة هي هي نفس شاشة ريلمي 8 العادي بالظبط .. شاشة 6.4 بوصة Super AMOLED بدقة FHD+ داعمة للـHDR10 وبتردد 60 هيرتز.

وهنا أستغرب واقول ازاي اوبو بتقدم رينو 5 بشاشة AMOLED ومعدل تحديث 90 هيرتز وريلمي بتقدم 60 هيرتز بس .. نقطة ضعف واضحة بصراحة في ريلمي 8 برو.

جودة ألوان الشاشة هنا مُمتازه مفيهوش مشاكل .. والحافة السُفلية هنا كبيرة، سطوع الشاشة ممتاز جدًا برده تحت الشمس ومش هتلاقي فيه أي مشاكل.


الأداء :-

كوالكوم سناب دراجون 720G بتكنولوجيا 8 نانو .. نفس معالج Galaxy A52 و Reno5 4G وكان مُستخدم في ريلمي 7 برو وريلمي 6 برو .. أشهر وأقدم معالج فئة متوسطة.

مفيش جديد يتقال تماما .. معالج قديم مش أفضل حاجة نهائيًا .. اللي هو أقل معالج يادوب يشغل نظام التشغيل بشكل معقول في الفئة المتوسطة .. أتمنى الشركات السنة الجاية تنسى المعالج ده خالص.

لما استخدمت رينو 5 جنب ريلمي 8 برو حسيت رينو 5 أسرع وأنعم في الإستخدام .. والـA52 نفس الكلام برده .. وموضوع التردد الأعلى فعلًا بيفرق في الإستخدام اليومي .. ومش حلو انه ميبقاش موجود في موبايل في الفئة دي علشان الكاميرات.

متتوقعش أقوى اداء رسومي .. ببجي High HD .. كول اوف ديوتي Very High .. وأداء الالعاب معقول بس المحلوظ ان الجهاز سخونيته قليلة جدا .. اقل من ريلمي 8 العادي بفرق ضخم .. ومن الأخر ريلمي مش عامله الموبايل ده للألعاب .. الموبايل ده معمول للكاميرات.


عوامل الأمان وعناصر اخرى :-

بصمة الإصبع تحت الشاشة .. سريعة ومفيهاش أي مشاكل .. والـFace Unlock ممتاز مفيهوش مشاكل .. وبيدعم الـ Always On Display لعرض الاشعارات على الشاشة وهي مقفولة.

الموبايل بيشتغل بنظام تشغيل Android 11 مع أحدث واجهة من ريلمي .. وللأسف الشديد الموبايل مفيهوش NFC ومعرفش الحقيقة ازاي!

صوت الموبايل Mono مش Stereo زي ريلمي 7 برو اللي فات .. مش عارف ليه ريلمي مقدمتش سماعة ستيريو في الموبايل بالسعر ده !

مستشعر التقارب المسؤل عن قفل الشاشة والموبايل على أذنك وانت بتعمل مكالمة شغال بكفاءة في ريلمي 8 برو, والموبايل بيدعم تسجيل مكالمات ولكن بيقول في المكالمة انك بتسجل.

بالنسبة لشبكات الإتصال وشبكة الـWi Fi فا هي ممتازة جدًا في الموبايل، متقلقش منها خالص.


البطارية :-

البطارية هنا بحجم 4500 مللي أمبير وادائها محترم في حدود 8 ساعات شاشة مفتوحة وقت كويس جدا.

الشاحن المُرفق 65 واط بيشحن فعلي 50 واط بس علشان اعتبارات امان .. الوقت الفعلي للشحن حوالي ساعة إلا ربع زي رينو 5 .. واحسن من موبايلات شاومي .. فا تمام ومش فارق كتير في الوقت الفعلي 65 وات من 50 وات !


الكاميرات :-

الكاميرا بقى .. النقطة اللي ممكن تشتري ريلمي 8 برو علشانها .. كاميرا خلفية اساسية 108 ميجا بيكسل فتحة عدسة F/1.9 والتانية 8 ميجا بيكسل تصوير واسع فتحه عدسة F/2.3 والتالتة 2 ميجا بيكسل ماكرو و الرابعة 2 ميجا بيكسل عزل … والسيلفي 16 ميجا بيكسل فتحة عدسة F/2.5.

أخر حاجة جربتها في الـ8 برو هي الكاميرات .. وبصراحة حمستني جدًا .. الكاميرا في ريلمي 8 برو قوية جدا وتقدر تنافس من ناحية الالوان والمعالجة والتفاصيل.

قارنتها بموبايل Redmi Note 10 Pro اللي بيجي بنفس مستشعر الكاميرا الخلفية الـ108 ميجا بيكسل ولكن شتان .. لقيت ريلمي متفوقه جدًا جدًا في معظم نتايج الصور .. الصور تحسها بتخرج من ريلمي متعالجة جاهزه مش محتاج تعدل عليها على عكس صور شاومي.

ده غير الـNight Mode اللي موضح جدًا قوة ريلمي في التفاصيل والالوان واللي قدرت تكسب كاميرا شاومي بكل سهولة .. اقدر أقولك ريلمي 8 برو بيجي بأحسن كاميرا 108 ميجا بيكسل في الفئة المتوسطة لحد دلوقتي.

السيلفي معقول جدًا متغيرش .. السيلفي المعتاد من ريلمي واوبو .. بينعم البشرة شوية بس بيطلع صور متعالجه كويس في معظم الوقت .. ولما الاضاءة بتقل برده هتقدر تاخد صور معقولة.

بالنسبة لتصوير الفيديوهات فالموبايل بيدعم تصوير فيديوهات على 4K مع 30 فريم في الثانية .. لكن للأسف مفيش ثبات إلكتروني على جودة الـ4K ولازم تنزل الجودة لـ1080p علشان تاخد ثبات إلكتروني .. والموبايل فيه ميكروفون اضافي لعزل الضوضاء وفيه وضع الـAi Highlight Video لتحسين ألوان الفيديو.


سعر Realme 8 Pro :-

  • نسخة 128 جيجا مع 8 جيجا رام بسعر 5690 جنية مصري

بينفع تركب شريحتين إتصال من الجيل الرابع مع كارت ميموري 512 جيجا في نفس الوقت.

realme 8 pro price


الرأي النهائي :-

مميزات Realme 8 Pro :-

  • كاميرا خلفية 108 ميجا بيكسل ممتازة
  • كاميرا سيلفي كويسة جدا
  • شاشة Super AMOLED ألوانها ممتازة
  • سوفت وير مُستقر بدون مشاكل
  • بطارية أداءها معقول مع شحن سريع 50 واط
  • شبكات الموبايل قوية جدًا
  • مستشعر تقارب المسؤل عن قفل الشاشة اثناء المكالمات ممتاز

عيوب Realme 8 Pro :-

  • صوت Mono عادي مش ستريو
  • سعر غير منافس
  • معالج ضعيف نسبيا
  • معدل تحديث 60 هيرتز فقط للشاشة
  • مفيش مستشعر الـNFC
  • لا يعتبر تطوير جذري مقارنتا بـ ريلمي 7 برو بخلاف الكاميرا الخلفية الرئيسية
هل اعجبك الموضوع :

تعليقات