القائمة الرئيسية

الصفحات

مراجعة Amazfit GTR 2 – ساعة ذكية، شيك وبطارية قوية !

مراجعة Amazfit GTR 2 – ساعة ذكية، شيك وبطارية قوية !




النهارده هنقدملكم مراجعة Amazfit GTR 2 .. ساعة ذكية مُميزة جدًا ومليانة Options .. الساعة دي دخلت السوق المصري يوم 4 ابريل اللي فات عن طريق وكيل “الصافي جروب” وهو نفس وكيل موبايلات شاومي في مصر، ونزل معاها مجموعة ساعات تانية لكن النهارده هنقدملكم مراجعة Amazfit GTR 2 الجديدة.

محتويات الصندوق :-

  • ساعة Amazfit GTR 2
  • باند إضافي
  • قاعدة الشحن
  • كتيب الإرشادات


التصميم :-

الساعة دي في منها إصدارين .. إصدار كلاسيك والإصدار الثاني Sport .. الـClassic بتيجي بخامة من الـ ستانلس ستيل لونه فضي لامع وباند جلد لونه أسود .. اما الـSport بتيجي بجسم ألومنيوم أسود مطفي وباند سيليكون أسود.

تصميم الساعة شيك جدًا وهيشدك جدًا .. وزنها خفيف أوي ودائرية من كل الجوانب، مش هتحس ابدًا ان فيها اي جنب حاد، حتى الحواف بتاعت الشاشة دائرية .. في الجنب هتلاقي زرارين .. اللي فوق بتاع الـHome وفيه جزء أحمر كده.

 

اللي تحت Shortcut لأي تطبيق تختاره .. وفي الظهر في مستشعر نبض القلب ومكان الشحن والسماعة والمايك .. والباند بتاع الساعة مقاسة 22 مم وتقدر تغيره عادي جدًا.


الشاشة :-

والساعة بتيجي بشاشة AMOLED بمقاس 1.39 بوصة .. كثافة بيكسلات فيها 326 بيكسل لكل بوصة .. وفيها حساس ضوء علشان يعدل سطوع الشاشة اوتوماتيكيًا حسب الإضاءه المُحيطة بيك.

سطوع الشاشة كويس لكن كان نفسي يكون أقوى من كده .. وكمان كانت هتبقى أريح في الإستخدام في ضوء الشمس المُباشر .. والساعه فيها Always On Display علشان يفضل الوقت ظاهر من غير ما تقفل.

الشاشة بتفتح لما تحرك او تلف ايدك .. وبتقفل لو غطيتها بإيدك .. وتقدر تلفها 180 درجة علشان لو هتلبسها في اليد اليمين او الشمال تكون مُريحة وسهلة في الظبط .. بالنسبة للخلفيات فا انت تقدر تختار من أشكال كتير جدًا وتعدل عليهم، وكمان ينفع تحط الصورة اللي انت عايزها كخلفية.


التحكم في Amazfit GTR2 :-

لما تسحب من فوق بينزل لك الـControl Center اللي فيه إختصارات لمعظم الإعدادات المهمة زي الفلاش والـDon’t Disturb Mode والـBattery Saving Mode وغيرها من الإعدادات .. لكن لما بتسحب الشاشة من تحت بيظهر لك الـNotification .. بتعرضلك الإشعارات اللي انت بتحددها من خلال تطبيق الساعة على الموبايل.

الساعة بتدعم اللغة العربية طبعًا عادي وكمان بتظهر الـEmojis بدون أي مشاكل .. ولو الرسالة كبيرة بتظهر كاملة عادي ومش بتحتاج تفتح الموبايل علشان تشوفها .. والساعة كمان فيها Haptic Vibration بيشتغل مع كل التنبيهات اللي بتجيلك على الساعه.

لما بتسحب من اليمين او الشمال فا انت بتتنقل بين بعض التطبيقات زي الـHeart Rate والطقس ونتائج أداءك لو عملت رياضة مثلًا .. وكمان تقدر تتحكم في الموسيقى اللي شغاله على الموبايل، ومن الإعدادات بتقدر تتحكم في إيه اللي يتعرض وايه لأ وكمان تقدر تحط Widgets مُعينة زي الـEvents او المنبه وما الى ذلك.

الزرار اللي فوق بيفتح الـHome Menu اللي فيها كل تطبيقات الساعة والإعدادات .. اما الزرار اللي تحت بتقدر تعمله Customize او تخصصه لأي تطبيق عايز توصله بسرعة.

الساعة فيها مساحة تخزين 3 جيجا بتقدر تخزن فيها من 300 لـ600 أغنية تقدر تسمعهم وانت بتتمرن وبالتالي مش هتبقى محتاج تاخد موبايلك معاك .. وتقدر توصل الساعة بـ سماعة بلوتوث عادي وتشغل من خلالها الأغاني المتخزنة على الساعة.

الساعة مقاومة للماء لعمق 50 متر .. وبما انها فيها ميكروفون فا تقدر تستحدمها للمكالمات والصوت بتاعها كان واضح ومفيش منه أي شكوى وعملت منها كذا مكالمة وكانوا كويسين جدًا .. وتقدر توصل الساعه بالـWiFi علشان تنقل أغاني عليها او تعمل لها Update.

الساعة فيها مساعد صوتي تقدر تخليه يفتح لك تطبيقات او ينفذلك بعض الأوامر زي انه يشغل تمرين معين او يفتح تطبيق مُعين .. بس بالإنجليزي طبعًا.


البطارية :-

الساعه بتيجي ببطارية ممتازة جدًا .. سعتها 471 مللي امبير، وبتوصل لـ14 يوم إستخدام .. ولو فاتح الـBattery Saving Mode ممكن تقعد معاك لحد 48 يوم متواصل.


الجانب الصحي :-

الساعة بتقيس معدل ضربات القلب ونسبة الأكسجين في الدم وبتتبع بيانات تمارينك كلها .. وبتقولك انت اتمرنت قد ايه وفين بالظبط وحرقت سعرات قد ايه .. والجميل ان في 12 رياضة مُختلفة ممكن تختار منها وتمارسها والساعة تعمل تتبع للداتا وتحللها .. والساعه بتقيس الضغط والمجهود برده.

الساعه بتشتغل عادي على موبايلات ابل واندرويد .. علشان تشغلها محتاج تحمل تطبيق ZEPP على الموبايل بتاعك وبتسجل عليه وبياخد منك شوية بيانات زي الأسم والسن والوزن والطول .. بتوصل الساعه عن طريق Scan Code وبكده تكون اتوصلت بالموبايل.

عن طريق التطبيق ده بقى بتعرف كل البيانات اللي الساعه جمعتها عنك .. زي حرقت كام سعرة حرارية ومشيت كام خطوة او نمت وقت قد ايه وكمان كفاءه نومك كانت عاملة ازاي.

وبتقدر كمان عن طريق التطبيق انك تحط Target ان هدف عايز تحققة . يعني مثلًا عايز تحرك كام سعرة حرارية في اليوم او هتخس قد ايه والساعه ساعتها بتبدأ تعمل تتبع لمجهودك طول اليوم وبتقولك انت تمام ولا لسه محتاج مجهود اكتر .. وفاضلك قد ايه على الهدف بتاعك، يعني لابس في إيدك مُدرب شخصي.

وكمان فيها نظام صحي كامل بيتابع كل بياناتك الصحية وبيقدملك عنها تقارير .. يعني مثلًا دقات القلبي اللي ينفع اللي ينفع تقيسها على مدار اليوم .. وبيقولك امتى كانت عالية شوية وامتى كنت مرتاح وممكن كمان تنبهك لو وصلت لمستوى خطير او مُقلق .. اما النوم فا بتقدملك عنه Score لجودة النوم بُناءًا على مدة النوم ووقته وكان عميق ولا لا.

نظام الـPersonal Activity Intelligence

ده بيكون خوارزمية كدة بتاخد الداتا اللي جمعتها عنك بالكامل من دقات قلب ونسبة اكسجين ومدة التمرين وكل الداتا اللي جمعتها .. وبيقدملك تقييم كدة عشان تعرف حالتك الصحية عاملة ايه وبيديك نصايح تعمل ايه عشان تحسن من رقمك وتقييمك، يعني مثلا اجري 19 دقيقة ووصل ضربات قلبك لرقم محدد لو مشيت 120 دقيقة هتزيد نقطتين وهكذا.

ده غير الداتا اللي انت بتدخلها بنفسك زي كثافة عضمك وضغط الدم والدهون وغيرها كتير من الداتا اللي بتساعدك تتراك حالتك الصحية بالكامل عن طريق التطبيق .. وبيكون ليك بروفايل عليه الداتا بتاعتك واهدافك وكمان بتضيف اصدقائك وتابعو تقارير بعض .. وكمان في إستطلاع كدة بتملاه بيعرفك عمرك اللائق او سن اللياقة بتاعتك قد ايه.

كل ده من خلال التطبيق بجانب التحكم في إعدادات الساعة نفسها .. بتقدر تغير الـWatch Face لأشكال كتير جدًا وتظبط الـVibration وتضيف أغاني جديدة على الساعة .. وتقدر تعرف مكان الساعة لو مش عارف مكانها، وحاجات تانية كتير.


سعر Amazfit GTR 2 :-

Amazfit GTR 2 Price
اسعار جميع ساعات Amazfit في مصر
  • نسخة الـClassic Edition بسعر 3499 جنية مصري
  • نسخة الـSport Edition بسعر 3199 جنية مصري

الرأي النهائي :-

من الأخر .. الساعة دي فيها كل اللي انت محتاجه من Smart Watch .. شكلها وتصميمها كويس وشيك تنفع على كل ستايلات اللبس .. مناسبة جدًا لممارسة الرياضية من كم الـOptions اللي بتقدمهولك في الجانب الصحي ده .. وبطارية كبيرة تقعد معاك إسبوعين كاملين.


Amazfit Smart Watchs

اسعار ساعات Amazfit في مصر :-

  • ساعة Amazfit GTS 2 Mini بسعر 1699 جنية
  • ساعة Amazfit GTS 2 بسعر 2999 جنية
  • ساعة Amazfit GTS 2e بسعر 2399 جنية
  • ساعة Amazfit GTR 2 Sport بسعر 3199 جنية
  • ساعة Amazfit GTR 2 Classic بسعر 3499 جنية ( هي اللي راجعناها )
  • ساعة Amazfit GTR 2e بسعر 2499 جنية


هل اعجبك الموضوع :

تعليقات